Двуязычный корпус чувашского языка

Текст: XII

Раздел: Ҫӗр ҫинчи ҫутӑсем –> Иккӗмӗш пай

Автор: Александр Яндаш

Источник: Бабаевский, Семен Петрович. Ҫӗр ҫинчи ҫутӑсем: роман; вырӑсларан Исаак Никифоров куҫарнӑ. — Шупашкар: Чӑваш АССР государство издательстви, 1952. — 7–514 с.

Добавлен: 2020.01.13 18:45

Предложений: 156; Слово: 1905

Тип текста: Проза

По-русски Тема: Не указано

Сергей Мускава тухса кайиччен Кондратьевӑн плана халех кабинетра мар, калас пулать, вырӑна тухса никама шанмасӑр, хӑйӗн пӑхса тӗрӗслес килчӗ. Ӑна йывӑҫсем лартма районта мӗн чухлӗ тӗп пурри ҫинчен тӗрӗс цифра кирлӗ пулнӑ, ҫав сӑлтавпа Кондратьев Чурсун утравӗнче пулма шутларӗ, унта вӑл пӗр хут та пулса курман. Строительствӑра кирлӗ чула ӑҫта тата мӗнле кӑлармаллине тӗплӗн пӗлмелле, ҫавӑнпа Кондратьев Очкурка тӑвӗ патне кайма палӑртрӗ: унта ҫутӑ-сӑрӑрах тӗслӗ вут чулӗ нумай. Ҫав чула мӗнле кӑлармаллине тата чул плитасене хӑш ҫулпа илсе тухмаллине вырӑна кайса пӑхас пулать. Кунсӑр пуҫне, ӑна, хӑй каланӑ тӑрӑх, пӗр колхоза «илсе сӑнас» шухӑш пырса кӗнӗ: унӑн укҫа-тенкӗ мӗн чухлӗ пуррине, ӗҫ вӑйӗ мӗн чухлине — йывӑҫсем лартма, пӗвесемпе кӳлӗсем тума миҫе ҫын яма май пуррине тӗплӗн сӑнаса пӗлмелле. Вӑл темшӗн инҫетри хуторти «Дружба земледельца» колхоза суйласа илчӗ. Кондратьева тата тусем ҫинчен юхса анакан пӗчӗк юханшывсем интереслентернӗ, вӗсен шывне ҫӗнӗрен тунӑ пӗвесене яма палӑртнӑ.

Ҫак тӗллевпе район тӑрӑх кайма палӑртнӑ та ӗнтӗ Кондратьев, вӑл Сергей Мускава илсе каякан план проектне мӗнле те пулин тӳрлетӳсем кӗртмелле пуласса шаннӑ… Малтан вӑл, Очкурка тӑвӗ патӗнче пулса, чул кӑларма лайӑх вырӑн пуррине палӑртнӑ, анчах Очкурка патне пыма ҫул япӑх: тасатмалла, темиҫе ҫӗрте чул сармалла. Унтан, Невинка ҫыранӗпе кайса, шыв кӳленчӗкӗсене, ҫырма-ҫатрасене, пӗчӗк вӑрмансемпе катасене, хӑмӑшлӑхсемпе айлӑмсене пӑхса тухрӗ, вара, «Дружба земледельца» патнелле кайнӑ май, Уст-Невински уйӗсене пычӗ. Кунта, сӑртсем айӗнче, вӑл ӑнсӑртран ултӑ мӑшӑр вӑкӑртан кая мар кӳлнӗ лава тӗл пулчӗ. Вӗҫе-вӗҫӗн кӳлнӗскерсем, вӗсем йывӑр та меллӗ мар тиев, — сарлака кустӑрмаллӑ локомобиле туртса пыраҫҫӗ; унӑн малалла тайӑлса тӑракан труби инҫетрен тупӑ кӗпҫи пекех курӑнать. Сывлӑшра пушӑсем шартлатаҫҫӗ, лавӑҫсем, йӗп-йӗпе тарланӑ тата хытӑ ывӑннӑ вӑкӑрсене хӑвала-хӑвала, тем тӗрлӗ сасӑпа ҫуйхашса шавлаҫҫӗ: «Чей-чей! Цоб-цобе! Цоб! Гей-гей!» Сӑрт варрине ҫитсен, лавҫӑсем тата хытӑрах шавлама пуҫларӗҫ, вӑкӑрсем, ытла йывӑррипе йывӑҫ сӳсменсем ҫине выртса, чӗркуҫленсе лараҫҫӗ, хура трубаллӑ тимӗр сӑрт вырӑнтан та тапранмасть.

— Кустӑрмисем айне савӑл хурӑр, савӑл! Кондратьев хӑйӗн шоферне чарӑнма хушсан, тимӗрпе тытса ҫавӑрнӑ йывӑҫ савӑлсене кайри урапасем айне хунӑччӗ ӗнтӗ, ҫавӑнпа туртӑннӑ сӑнчӑр пушанчӗ, вара йӗп-йӗпе вӑкӑрсем, йывӑррӑн та хӑвӑрттӑн сывласа чарӑнчӗҫ те пуҫӗсене усрӗҫ.

Локомобиль ытла та кивелнӗскер, хӑйӗн нумай ҫулсем хушшинчи пурнӑҫӗнче вӑл ватӑлма тата халран кайма ӗлкӗрнӗ пек туйӑнать: унӑн пӗтӗм ӳт-пӳне шыҫӑсем, кӑвакарнӑ паллӑсем хупласа илнӗ; пур ҫӗрте те кивӗ саплӑксем, шӑтӑк-путӑксем, тутӑхнӑ вырӑнсем, пӗр пӑхӑр шӑхличне кӑна ҫав тери якатса тасатнӑ та, вӑл хӗвел ҫинче чӗлхем пек ялкӑшать.

Виҫӗ арҫын — кустӑрмасем айне савӑл хунисем — ӳсӗре ӳсӗре тата темшӗн айӑплӑн кулкаласа, Кондратьев патне пычӗҫ. Иккӗшне Кондратьев палламасть, виҫҫӗмӗшӗ Стефан Петрович Рагулин — хальчченхи пекех чӗрӗ те васкаварлӑ старик; вӑл ҫаннисене тавӑрнӑ, картузӗ ӗнси ҫинех анса ларнӑ.

— Лайӑх паровик лекрӗ пире, — терӗ вӑл, Кондратьева сывлӑх сунса, — анчах кӑштах йывӑртарах…

— Ӑҫта турттарса каятӑр эсир ӑна?

— Хамӑр пата илсе каятпӑр… — Рагулин пуҫне пӗшкӗртрӗ те, калаҫнӑ чухне темшӗн секретарӗн куҫӗсенчен пӑхмарӗ. — Молотилкӑпа юнашар лартатӑп… сых ятне.

— Мӗне кирлӗ вӑл? Стефан Петрович, эсир электричествӑна шанмастӑр-им?

— Шанасса шанатпӑр эпир, — Рагулин ӗнсине хыҫса илчӗ, — анчах паровик те ҫӑкӑр ыйтмасть, пулӑшма пултарать… Электричествӑна эпӗ те ӗненетӗп, анчах хамӑн: Прохорӑн пӗлӗвне ӗненместӗп… Мотора ҫунтарса ячӗ вӗт-ха!.. Ун пек инкек хӗрсе авӑн ҫапнӑ чухне пулас пулсан?

— Ахалех тӑрӑшатӑн, Стефан Петрович, — терӗ Кондратьев, — пӑхсах курӑнать ку паровик мӗнле те пулин инкек пулсан, унтан хӑтармасть… Вӑкӑрсене усӑсӑр асаплантаратӑр.

— Вӑкӑрсене йывӑртарах — ку ҫаплах ӗнтӗ, — шухӑшлӑн каларӗ Рагулин. — Ку шуйттана трактор ҫумне кӑкармаллаччӗ. Эпӗ ыйтрӑм та, Чурилов памарӗ… «Паровике ил, вӑл сана питех те кирлӗ пулать», — тет, анчах ӑна илсе килме трактор пама хӗрхенчӗ.

— Николай Петрович, — терӗ пӗрмаях чӗнмесӗр тӑнӑ ҫамрӑк сӑнарлӑ арҫын, сарӑ пуҫлӑскер, шӗвӗр сӑмсаллӑ, йӑлтӑртатакан чакӑр куҫлӑскер, — эсир пирӗнтен молотилка ҫумне лартнӑ пӗчӗк мотора шанатӑр-и, ҫук-и, тесе ыйтатӑр. Ӑнланатӑп, сирӗн, райком секретарӗн, ҫынсем электричество ҫине мӗнле пӑхнине пӗлес килет… Хам ҫинчен калатӑп. Манӑн специальность — машинист, эпӗ ҫак локомобиль ҫумӗнче ӳссе ҫитӗннӗ, ҫавӑнпа уҫҫӑнах калатӑп: электричествӑна эпӗ ӗненетӗп, унӑн вӑйӗ пысӑк, пирӗн пулас пурнӑҫра та вӑл хӑй вырӑнне йышӑнать, анчах эпӗ чылай иккӗленетӗп… Чун-чӗрере татса паман ыйтусем пур… Электричество — вӑл нимӗн те мар-ха, унпа ӗҫлеме эпир кӑҫалах вӗренетпӗр, нимӗнле иккӗленӳ те пулас ҫук. Политикӑллӑ ыйтӑва илер-ха. Ҫапла калӑпӑр: эпӗ, локомобиль машинисчӗ, коммунизма активлӑ тӑватӑп, вӑл ҫӗнтерессе хам та ӗненетӗп, анчах нумай ҫӗрте иккӗленетӗп, ыйтусем хӑйсемех тухса тӑраҫҫӗ, анчах вӗсем ҫине ответлеме пултараймастӑп… Вӑт ку шутламалли ӗҫ!

— Санӑн мӗнле иккӗленӳсемпе ыйтусем пур вара? — ыйтрӗ Кондратьев.

— Егор, эсӗ хӑвӑн ыйтӑвусемпе тӑхта-ха! — терӗ те Рагулин ҫилленсе Кондратьев еннелле ҫаврӑнчӗ:  — Николай Петрович, ҫак иккӗленӗве татса парӑр-ха: мӗнле майпа пирӗн вӑкӑрсене те муритлес мар, паровике те сӑрта хӑпартас?

Машинист, Рагулин ҫине кӳренсе пӑхкаласа, айккинелле пӑрӑнса кайрӗ. Кондратьев Рагулина темскер пӗлтересшӗнччӗ, унтан Егорпа калаҫасшӑнччӗ, анчах ҫак вӑхӑтра лаша ури сасси илтӗнчӗ — вӗсем патне Андрей Васильевич Кнышев чуптарса ҫитрӗ. Лаша ҫинчен анмасӑрах, старик Кондратьева, Рагулина сывлӑх сунчӗ унтан, буркине хывса, хӑй ҫулне кура мар паттӑрӑн ҫӗре сиксе анчӗ.

— Эпӗ, Стефан Петрович, сирӗн коневод патне васкатӑп, — терӗ Кнышев. — Ҫамрӑк патне канаш ыйтма каятӑп… Ӑна килте тупатӑп-ши?

— Вырӑнтах пулма тивӗҫ, — терӗ Рагулин, вӑкӑрсем ҫине тимлесе пӑхса.

Кондратьев пирус коробки кӑларчӗ те, пурте туртса ячӗҫ.

— Стефан Петрович, — терӗ Кондратьев, — кунта, инҫех мар, трактор отрячӗ тӑрать. Манӑн машинӑпа пӗр ҫӑмӑл ҫамрӑка яр-ха: трактор илсе килес пулать. Эпӗ бригадир патне хут ҫырӑп, пулӑшӗ тесе шутлатӑп. Вӑкӑрсене тӑварӑр та, курӑк ҫине ярӑр…

Стефан Петрович ҫакна кӑна кӗтнӗ темелле. Кондратьев хушнине пурнӑҫлама вӑл хӑй тытӑнчӗ, вара лавҫӑсем хушшинче ҫӑмӑл ачана часах шыраса тупрӗ. Ҫамрӑк ача Кондратьевран запискӑна пысӑк тивӗҫпе илчӗ, машина ҫине шоферпа юнашар кӗрсе ларчӗ, мухтанчӑклӑн кулса илчӗ, вара машина, сӑрт хӗррипе ҫаврӑнчӗ те, часах сӑрт леш енне пулса ҫухалчӗ. Локомобиль патӗнче тӑракансем, малтан калаҫса татӑлнӑ пекех, пурте пӗр харӑс аяккалла кайса, курӑк ҫине ларчӗҫ. Табак тӗтӗмӗ кунта пуриншӗн те тата пылакрах пек туйӑнчӗ — пуҫ ҫинче кӑвак тӗтӗм явӑнать. Андрей Васильевич Кнышев, япӑх мар компани пухӑннине, кунта кампа калаҫма пулассине туйса, кӑштах канма шухӑшларӗ: вӑл йӗвен чӗлпӗрне лаша уринчен ҫыхрӗ те, буркине сарса, лаша кӗтуҫӗ пек, Кондратьев ҫумне айккӑн выртрӗ.

Пӗр-икӗ минут шарламасӑр табак туртрӗҫ; пирус тӗтӗмӗпе киленчӗҫ, кашни мӗн ҫинчен калаҫмаллине шухӑшласа пӑхрӗҫ пулмалла. Кондратьев айккӑн-айккӑн Егор ҫине пӑхкаларӗ, — вӑл ӑна куҫӗсенчен пӑхма тӑрӑшни палӑрчӗ, анчах машинист, аллине янах айне тӗрелесе, пирус туртрӗ, вӑкӑрсем курӑк ҫисе ҫӳрекен сӑрт тайлӑмӗ еннелле шухӑша кайса пӑхрӗ.

— Егор, санӑн мӗнле иккӗленӳсем пуррине, татса парайман ыйтусем туха-туха тӑнине каласа памарӑн-ҫке эсӗ? — терӗ Кондратьев, чакӑр курӑкӑн кӗрен-кӑвак чечекне шыраса тупса.

— Ун чухне мана Стефан Петрович чарчӗ, — терӗ Егор, сӑмсисенчен тӗтӗм кӑларса, — халӗ ӗнтӗ темшӗн ун ҫинчен тапратас килмест.

— Мӗншӗн тапратас килмест? — Кондратьев чакӑр курӑнсан татах тепӗр чечекне татса илсе, ӑна пур енчен те ҫавӑркаласа пӑхма тытӑнчӗ.

— Ун пекки ҫинчен калаҫма шӑпах вӑхӑт, — хутшӑнчӗ Рагулин, — пурӗ-пӗрех ӗҫсӗр ларатпӑр…

— Ответлеме пултаратӑр-и? — Кондратьева хӑюллӑн та витӗмлӗн куҫран пӑхрӗ Егор.

— Тӑрӑшӑп, — терӗ Кондратьев, чакӑр курӑкӑн чечекӗсене пӗр ывӑҫ пуҫтарса.

Егор, ҫӗкленсе тӑрса, урине хутлатса ларчӗ те, пирусне аяккалла пӑрахрӗ. Вара вӑл ҫапла каларӗ:

— Эсир пӗтӗмӗшле мар, тӗслӗхсем илсе кӑтартса ответлӗр… Теори тӗлӗшпе эпӗ хам та хӑшпӗр япалана ӑнланатӑп, анчах реальнӑ… Реальнӑ калама пултаратӑр-и?

— Ку вӑл мӗнле ыйтусем пулнинчен килет, — ответлерӗ Кондратьев, чечек ҫине пӑхса савӑнса.

Егор сысна курӑкӗн пысӑк та симӗс ҫулҫине татса илчӗ те, ун ҫинче темскер вуласшӑн пулнӑ пек, ӑна ҫавӑркаласа пӑхрӗ, кӑшт вӑхӑт чӗнмесӗр ларчӗ. Стефан Петровичпа Андрей Васильевич ҫак самантра пӗр-пӗрин ҫине пӑхса илчӗҫ, темшӗн пӳрнисемпе хӑйсен Ылтӑн Ҫӑлтӑрӗсене тытса пӑхрӗҫ, вара вӗсен ватӑ пит-куҫӗсем кулса илчӗҫ. Лавҫӑсем пырса, айккинерех ларчӗҫ, унтан вӗсем те итлеме хатӗрленчӗҫ.

— Простой ыйту, — терӗ Егор, сысна курӑкӗн ҫулҫи ҫинче темскер вуласа: — коммунизм чухне эпир мӗнле пурӑнӑпӑр?.. Стефан Петровичпа Андрей Васильевич, эсир Ӗҫ Геройӗсем пулсан та, куҫсене ан хӗсӗр-ха, ан кулӑр. Ку калаҫу — кирлӗ калаҫу, кун пек ыйту — хальхи вӑхӑтра кашнин пуҫӗнчех пур… Ҫынсем мӗн каланине итлесе пӑхӑр эсир…

— Эсӗ илтнӗ-и вара? — ыйтрӗ Кондратьев, сирень тӗслӗ чечексен сапакине шӑршласа.

— Итлесе пӑхма тӳр килнӗччӗ…

— Мӗн калаҫаҫҫӗ-ха вӗсем?

— Калаҫу, паллах, тӗрлӗрен пулать, пурне те аса илме ҫук, — Егор ҫаплах сысна курӑкӗн ҫулҫине сӑнать, ӑна чӗрнипе чӗре-чӗре пӑхать. — Ватӑ ҫынсем кӳренсе калаҫаҫҫӗ: «Хӑҫан пулать-ха вӑл, эпир унччен пурӑнаймастпӑр та…» — теҫҫӗ. Шухӑшлатӑн та — тӗрес. Эпӗ акӑ ватӑ та мар, ҫапах хама хам калатӑп: хӑҫан эпир ҫав пурнӑҫа ҫитетпӗр?

— Эсӗ ху мӗнле шутлатӑн? — ыйтрӗ Стефан Петрович.

— Шутласса шутлатӑп эпӗ, анчах татса пама пултараймастӑп… Теори енчен илсен, тухать, анчах реальнӑй курасчӗ ӑна…

— Нумай пулмасть эпӗ Мускавра пултӑм: ҫак наградӑна илме кайнӑччӗ, — пӳлчӗ унӑн сӑмахне Кнышев; старик, сӑрт-ту халӑхӗсем пек, урисене хуҫлатса, кӗскен каснӑ шурӑ сухалне якатса ларать, алли кӑкӑр ҫинче, Ылтӑн Ҫӑлтӑрпа «Ҫурлапа Мӑлатук» ҫакса янӑ ҫӗрте. — Эсӗ, Стефан Петрович, ҫуркунне пулнӑ-пулман кайнӑччӗ, эсӗ кӑштах каярах… Ҫапла, наградӑсем парсан, эпир, пурте пӗр ҫын пек, Геройсем пулсан, пире Иосиф Виссарионович хӑй патне калаҫӑва чӗнчӗ. Паллах, пирӗн хушӑра ҫамрӑк Геройсем те пурччӗ, анчах Иосиф Виссарионович пирӗн пата, стариксем ҫывӑхнерех ларчӗ. Ну, калас пулать, пурнӑҫ ҫинчен, иртни, пуласси ҫинчен калаҫу пуҫларӑмӑр, кунтах тата коммунизм ҫинчен те калаҫрӑмӑр. Иосиф Виссарионович темле, сӑмах майӑн, пире пурне те тӑрӑшса ӗҫленӗшӗн мухтарӗ те, вара калать: колхозсенче хӑвӑр ӗҫпе чапа тухнисем, эсир пурте, коммунизм тума пуҫлас ӗҫре чи малта пыракансем пулатӑр, тет. Ун хыҫҫӑн, простой кӗтӳҫӗ, Донра пурнаканскер, тӑчӗ те ответлет: «Тӗрӗс, Иосиф Виссарионович, эпир ҫав ҫӗнӗ пурнӑҫа пуҫлакансем, анчах ҫулсем иртни кӳрентерет — ҫӗнӗ ҫурт тӑватпӑр, ӑна илемлететпӗр, анчах ҫав ҫурта пурӑнма кӗме тӳр килмест пулӗ…» — тет. Иосиф Виссарионович тимлӗн итлерӗ, вара кулчӗ те каларӗ: мӗншӗн тӳр килмест апла! Ӗҫ Геройӗсем, малта пыракан ҫынсем, ҫав ҫурта кӗме мӗншӗн тӳр килмест вара сире? Эпӗ тӳр килет тесе шутлатӑп. Калас пулсан: эпир сирӗнпе ытла ватӑ стариксемех мар-ха, калатӑп эпӗ сире, ҫав ҫӗнӗ ҫурта кӗретпӗр эпир, унта киленичченех пурӑнатпӑр, тет… Эсӗ те, Егор, чылай ҫула ҫитнӗ ҫынсене ҫавӑн пек ответле… Мӗне те пулин ӗненсен, яланах ҫавӑн патне ҫитетӗн…

— Кӑна мана килӗшнӗ пек каланӑ, — ырларӗ Рагулин.

— Калас пулать, Андрей Васильевич, сирӗн ответ питех те вырнаҫуллӑ, — килӗшрӗ Кондратьев.

— Тӗп ыйту? — хумханса каларӗ Егор, сысна курӑк ҫулҫине пӳрнепе шӑтарса. — Пурнӑҫ мӗнле пулать унта?

— Эсӗ пӗлместӗн-и-ха? — тӗлӗнсе ыйтрӗ Рагулин. — Эх, эсӗ, машинист! Ун чухне хӑвӑн вӑйпа ӑс-тӑн ҫитнӗ таран ӗҫлетӗн, мӗн чухлӗ кирлӗ, ҫавӑн чухлӗ илетӗн. Акӑ сана пӗтӗм ответ.

— Эпӗ ӑна пӗлетӗп, — Егор сысна курӑк ҫулҫине ҫурса вакларӗ. — Теори енӗпе илсен, пулассӑн туйӑнать. Практикӑра мӗнле, практикӑра эпир халӗ ӗҫленӗ пек, тӑрӑшнӑ пек камӑн ӗҫлес-тӑрӑшас килтӗр-ха, кӑш-каш ӗҫлесен те хӑв ӗҫленӗ тӑрӑх мар, мӗн чухлӗ кирлӗ, ҫавӑн чухлӗ илетӗн вӗт-ха, — Егор аллисене саркаларӗ:  — Мӗнле пурнӑҫ ку? Ниепле стимул та ҫук!.. Ӗҫлеме хавхалантарса тӑраканни ҫук.

— Авӑ мӗншӗн пӑшӑрханать! Ҫав стимул халех пур вӑл, — терӗ Стефан Петрович, куҫӗсемпе Кондратьев еннелле хӗссе. — Егор, эсӗ хута лайӑх пӗлекен ҫын, интеллигента тухнӑ машинист, калас пулать, тӗрлӗ техникӑна пӗлекен ҫын пулсан та, пирӗн простой пурнӑҫа нимӗн те пӗлместӗн…

— Мӗнле пӗлместӗп? — кӳренсе мӑкӑртатрӗ Егор.

— Ҫаплах… Эсӗ пирӗн ҫынсем ҫине пӑх-ха, вара вӗсенче ҫав стимула курӑн. Кала-ха, эпир хамӑр пуясшӑн: ҫакӑн пек хӗрӳллӗн ӗҫлетпӗр-и вара? Калӑпӑр, мана илес. Ҫулсем тӑрӑх шутласан, манӑн тахҫанах шӑмака ҫинче, авалхи пек калашле, маччана сурса выртмалла. Эпӗ выртмастӑп. Простой ӗҫе мар тӑватӑп, колхоза ертсе пыратӑп… Мӗншӗн эпӗ канма каймастӑп? Мӗншӗн тесен ӗҫсӗр пурӑнма пултараймастӑп… Ку мӗне пӗлтерет, ӑнлантарса пар-ха? Пултараймастӑн… Ҫӗнӗ стимул ҫакӑ ӗнтӗ вӑл, унпа эпир коммунизма кӗретпӗр… Е манпа тантӑш Андрей Васильевича илер-ха — акӑ вӑл, пирӗнпе ларать. Мӗншӗн-ха вӑл ватӑлмалӑх кунӗнче юланутпа чуптарса ҫӳрет тата лашасен тӗрлӗ йӑхне ӳстерет? Унӑн мӗн вара: инкек-хурлӑх-и е нуша? Е вӑл, ҫав ҫӗнӗ йӑха тупса, хӑйне валли миллионшар тенкӗ укҫа тӑвать? Ҫынӗ ӗҫлет, мӗнле ӗҫлет-ха тата ҫитменнине? Акӑ вӑл сана, Егор, стимул! Вӑйлӑ тырпулшӑн куллен кӗрешекен пирӗн хӗрача-стахановкӑсем — ку сана ҫӗнӗ стимул мар-и вара? Хӑйсен пилӗкҫуллӑхне виҫӗ ҫул малтан тултаракан малта пыракан рабочисем, — ку стимул мар-и вара? Кун пек ҫынсем пирӗн сахал мар — хамӑр колхоза илсе пӑх-ха эсӗ…

Кондратьев ырласа кулнине курсан, Стефан Петрович, колхозри тӗслӗхсене илсе кӑтартса, шухӑша туллинрех ӑнлантарма шутланӑччӗ, анчах ҫак вӑхӑтра ҫӗр тӗпӗнчен тухакан кӗрлев илтӗнчӗ те сӑрт ҫинче гусеничнӑй трактор курӑнчӗ, ун умӗнче легковой машина пырать. Стефан Петрович Егора ку темӑпа тепӗр чухне калаҫма сӑмах парсан, пурте тӑчӗҫ…

Локомобиль, гусеничнӑй трактор йӗрӗ ҫине хӑй урапин сарлака йӗрне хӑварса, трактор хыҫҫӑн ҫӑмӑллӑнах шуса кайсан, машинӑра ларакан Кондратьев хӑйӗн блокночӗ ҫине: «Ӗҫӗн ҫӗнӗ стимулӗ… Агитаторсемпе калаҫу ирттермелли тема…» — тесе ҫырса хучӗ.

Сайт:

 

Статистика

...подробней