Двуязычный корпус чувашского языка

Текст: XI сыпӑк

Раздел: Обломов –> Пӗрремӗш пайӗ

Автор: Александр Артемьев, Михаил Рубцов

Источник: Иван Гончаров. Обломов: роман. Александр Артемьевпа Михаил Рубцов куҫарнӑ. Шупашкар: Чӑваш АССР государство издательстви, 1956

Добавлен: 2019.10.09 22:44

Предложений: 80; Слово: 535

Тип текста: Прозаичное произведение

По-русски Тема: Не указано

Пиллӗкмӗш сехет пуҫламӑшӗнче Захар асӑрханса, шавламасӑр, малти пӳлӗм алӑкне уҫрӗ те чӗрне вӗҫҫӗн утса хӑйӗн пӳлӗмне кӗчӗ; кунта вӑл улпут пӳлӗмӗн алӑкӗ патне пычӗ те ун ҫумне хӑлхине тытса итлерӗ, кайран кукленсе ларса, ҫӑра шӑтӑкӗ витӗр пӑхрӗ.

Пӳлӗмре пӗрпеккӗн хӑрлаттарни илтӗнет.

— Ҫывӑрать, — пӑшӑлтатрӗ Захар, — вӑратас пулать, часах пилӗк сехет ҫурӑ ҫитет.

Вӑл ӳсӗрсе илчӗ те пӳлӗме кӗчӗ.

— Илья Ильич! Илья Ильич тетӗп! — пуҫларӗ вӑл хуллен, Обломов пуҫ вӗҫӗнче тӑрса.

Хӑрлаттарнӑ сасӑ чарӑнмарӗ.

— Эк-кей ҫывӑрать! — терӗ Захар: — чул касакан пекех. Илья Ильич!

Захар Обломова кӑштах ҫаннинчен туртрӗ.

— Тӑрӑр; пилӗк сехет ҫурӑ.

Илья Ильич ӑна хирӗҫ ӗнӗрлесе илчӗ ҫеҫ, анчах вӑранмарӗ.

— Тӑрӑрсам ӗнтӗ, Илья Ильич! Мӗнле намӑс ку! — терӗ Захар, сассине хӑпартса. Хирӗҫ чӗнни пулмарӗ.

— Илья Ильич! — терӗ Захар, улпута ҫаннинчен туртса. Обломов кӑштах ҫаврӑнчӗ те, хӑрах куҫне аран-аран уҫса, Захар ҫине пӑхрӗ. Куҫӗ паралич ҫапнӑ ҫынӑнни пекех курӑнчӗ.

— Кам унта? — ыйтрӗ вӑл хӑрӑлтатакан сассипе.

— Эпӗ ку. Тӑрӑр.

— Кай кунтан! — мӑкӑртатса илчӗ те Илья Ильич, каллех йывӑр ыйха путрӗ.

Харлаттарни вырӑнне сӑмсапа шӑхӑрттарни илтӗне пуҫларӗ. Захар улпута аркӑран туртрӗ.

— Мӗн кирлӗ сана? — хаяррӑн ыйтрӗ Обломов, сасартӑк икӗ куҫне те уҫса.

— Эсир хӑвӑра вӑратма хушрӑр.

— Ну, пӗлетӗп. Хӑвна хушнине турӑн пулсан, кай кунтан! Ыттине хамах тӑватӑп…

— Каймастӑп, — терӗ Захар, ӑна каллех ҫаннинчен туртса.

— Ну, ан тӗкӗн тетӗп! — кӑмӑллӑн каларӗ Илья Ильич, унтан пуҫне минтер ӑшне чиксе, хӑрлаттарма пуҫларӗ.

— Юрамасть, Илья Ильич, — терӗ Захар, — эпӗ питӗ вӑратмӑттӑм та, анчах юрамасть!

Хӑй улпута тӗрткелерӗ.

— Ну, хӗрхен-ха, тархасшӑн, ан чӑрмантар, — ӗнентерсех каларӗ Обломов, куҫӗсене уҫса.

— Хӗрхен сире, кайран хӑвӑрах вӑратман тесе ҫиленетӗр.

— Ах, турӑҫӑм! Мӗнле этем эсӗ! — терӗ Обломов. — Ну, пӗр минут хушши ҫывӑрса илме пар хӑть; ну, пӗр минут нумай-и вара вӑл? Эпӗ хамах пӗлетӗп…

Илья Ильич, питӗ ыйхӑ пуснипе, сасартӑк шӑпланчӗ.

— Ҫывӑрма пӗлетӗн эсӗ! — терӗ Захар, улпут илтменнине пӗлсе. — Ҫывӑрать ав, ӑвӑс каска пекех! Мӗншӗн ҫуралнӑ-ши эсӗ ҫут тӗнчене?!

— Тӑр-ха тетӗп! Сана калаҫҫӗ… — ҫухӑрса янӑччӗ Захар.

— Мӗн? Мӗн? — хаяррӑн каларӗ Обломов пуҫне ҫӗклесе.

— Мӗншӗн тӑмастӑр, сударь, тетӗп? — ҫемҫен каларӗ Захар.

— Ҫук, эсӗ мӗн каларӑн-ха — э? Апла калама мӗнле хӑятӑн — э?

— Мӗнле?

— Сиввӗн калама?

— Сире тӗлӗкре ҫакӑн пек туйӑннӑ… туршӑн та, тӗлӗкре…

— Эсӗ ҫывӑрать терӗн-им мана? Эпӗ ҫывӑрмастӑп, йӑлтах илтетӗп…

Хӑй каллех ҫывӑрса кайрӗ.

— Ну, — терӗ Захар шанчӑка ҫухатса: — ах, эсӗ, пуҫ. Мӗн, каска пек выртатӑн? Сан ҫине пӑхма йӗрӗнмелле вӗт. Пӑхӑр-ха, ырӑ ҫынсем!.. Тьфу!

— Тӑрӑр, тӑрӑр! — сасартӑк хӑранӑ сасӑпа каларӗ вӑл. — Илья Ильич! Пӑхӑр-ха, хӑвӑр тавра мӗн пулса иртнине…

Обломов хӑвӑрт пуҫне ҫӗклерӗ, йӗри-тавра пӑхрӗ те, йывӑррӑн сывласа илсе, каллех выртрӗ.

— Ан чӑрмантар мана! — терӗ вӑл чӑнласа. — Эпӗ сана вӑратма хушнӑччӗ, халӗ вӑратма хушмастӑп — илтетӗн-и? — Хӑҫан тӑрас килет, ҫавӑн чухне хамах тӑратӑп.

Тепӗр чухне Захар:
— Ҫывӑрах, ҫӑва патне! — тет те уйрӑлать.

Тепӗр чухне тата хӑйӗннех перет, халӗ те хӑйӗннех каларӗ.

— Тӑрӑр, тӑрӑр! — пӗтӗм вӑйран кӑшкӑрса каларӗ те вӑл, икӗ аллипе те Обломовӑн халат аркинчен, ҫаннинчен ярса тытрӗ.

Обломов сасартӑк, кӗтмен ҫӗртен ура ҫине сиксе тӑчӗ те Захар ҫинелле ыткӑнчӗ.

— Тӑхта, улпута мӗнле чӑрмантармаллине вӗрентем эпӗ сана! — терӗ вӑл.

Захар пӗтӗм вӑйпа унран тарчӗ, анчах виҫӗ утӑм тусанах Обломов пӗтӗмпех вӑранчӗ те, карӑнма, анаслама тытӑнчӗ.

— Квас… пар… — терӗ вӑл анасланӑ хушӑрах. Ҫавӑнтах, Захар ҫурӑмӗ хыҫӗнче, такам хыттӑн ахӑлтатсаскулса ячӗ. Иккӗшӗ те ҫаврӑнса пӑхрӗҫ.

— Штольц! Штольц! — хытӑ хӗпӗртесе кӑшкӑрчӗ Обломов, хӑна еннелле ыткӑнса.

— Андрей Иваныч! — шӑл йӗрсе каларӗ Захар. Штольц ҫаплах каҫса кайса кулчӗ: вӑл кунта мӗн пулса иртнине йӑлтах курса тӑнӑ иккен.

Сайт:

 

Статистика

...подробней